NLD ဖွဲ့စည်းတည်ထောင်ခြင်း ၂၇ နှစ်ပြည့် အခမ်းအနား ကြေညာချက် ထုတ်ပြန်

NLD ဖွဲ့စည်းတည်ထောင်ခြင်း ၂၇ နှစ်ပြည့် အခမ်းအနား ကြေညာချက် ထုတ်ပြန်

အမျိုးသားဒီမိုကရေစီ အဖွဲ့ချုပ် (NLD) အား ၂၇ နှစ်တိုင်တိုင် ဘ၀နှင့် ဆန္ဒကို အရင်းတည်ခဲ့ကြသော အဖွဲ့ချုပ် အဖွဲ့ဝင်များ၊ တိုင်းရင်းသား ပြည်သူလူထုများကို အလေးအမြတ် ပြုသောအားဖြင့် ၂၀၁၅ ခုနှစ် ပါတီစုံ ဒီမိုကရေစီ အထွေထွေရွေးကောက်ပွဲ၌ အဖွဲ့ချုပ် အပြတ်အသတ် အနိုင်ရရမည်ဟု သန္နိဋ္ဌာန်ချရင်း ကြိုးပမ်းဆောင်ရွက်ကြပါစို့ဟု စက်တင်ဘာ ၂၇ ရက်က ရန်ကုန်မြို့၊ ဗဟန်းမြို့နယ်ရှိ NLD (ရုံးချုပ်) အဆောက်အအုံအသစ်၌ ကျင်းပခဲ့သော NLD တည်ထောင်ခြင်း ၂၇ နှစ်ပြည့် နှစ်ပတ်လည် အခမ်းအနားက ကြေညာချက် ထုတ်ပြန်ခဲ့သည်။

အဆိုပါ အခမ်းအနားသို့ NLD နာယက ဦးတင်ဦး တက်ရောက် မိန့်ခွန်းပြောကြားခဲ့ပြီး ၈၈ မျိုးဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်း အပါအ၀င် နိုင်ငံရေး အင်အားစုများမှ ပုဂ္ဂိုလ်များ၊ သံတမန်များ၊ မြို့နယ်အသီးသီးမှ NLD အဖွဲ့ဝင်များ တက်ရောက်ခဲ့ကြသည်။

၂၀၁၅ ခုနှစ်သည် လွတ်လပ်ရေး ဗိသုကာ၊ အမျိုးသားခေါင်းဆောင်နှင့် တပ်မတော်ဖခင်ကြီး ဗိုလ်ချုပ်အောင်ဆန်း၏ နှစ်တစ်ရာပြည့် မွေးနေ့ အချိန်အခါသမယနှင့် လည်းကောင်း၊ မြန်မာနိုင်ငံ၏ အနာဂတ်ကို အဆုံးအဖြတ်ပေးမည့် ပါတီစုံ ဒီမိုကရေစီ အထွေထွေ ရွေးကောက်ပွဲနှင့် လည်းကောင်း ထူးခြားစွာ တိုက်ဆိုင်နေကြောင်း၊ ဗိုလ်ချုပ်အောင်ဆန်း၏ နှစ်တစ်ရာပြည့်ကို ဂုဏ်ပြုသောအားဖြင့် စစ်မှန်သော နိုင်ငံရေး အပြောင်းအလဲကို ပေါင်းစည်းဖြည့်ဆည်းသောအားဖြင့် ရွေးကောက်ပွဲ၌ အပြတ်အသတ် အနိုင်ရရှိရေး ကြိုးပမ်းရန်လည်း NLD ဗဟိုအလုပ်အမှုဆောင် အဖွဲ့က ထုတ်ပြန်သည့် အဆိုပါ ကြေညာချက်တွင် ပါရှိသည်။

NLD ပါတီ ဖွဲ့စည်းတည်ထောင်ခဲ့သည့် ၂၇ နှစ် ကာလရှည်အတွင်း အေးအေးချမ်းချမ်း အနှောင့်အယှက်ကင်းစွာ ရပ်တည်ခဲ့ရသည် မဟုတ်ဘဲ အာဏာရှင်စနစ်၏ ဗိုလ်ကျစိုးမိုးမှု အမျိုးမျိုးကို အန်တုယှဉ်ပြိုင်ခဲ့ရကြောင်း အမျိုးသားဒီမိုကရေစီ အဖွဲ့ချုပ်၏ သမိုင်းသည် မြန်မာနိုင်ငံ၏ ဒီမိုကရေစီ လှုပ်ရှားရုန်းကန်မှု သမိုင်းဖြစ်ကြောင်း၊ မြန်မာနိုင်ငံ၌ နှစ်ပေါင်း ၂၇ နှစ်တိုင်တိုင် အုပ်ချုပ်မှု စနစ်ဆိုး၏ ထုသားပေသားခံလျက် ကြီးထွားရှင်သန်ခဲ့သော ပါတီ၊ ပြည်သူလူထုနှင့် ထပ်တူခံစား ယှဉ်တွဲတိုက်ပွဲဝင်ခဲ့သော ပါတီသည် အမျိုးသားဒီမိုကရေစီ အဖွဲ့ချုပ်သာလျှင် ဖြစ်သည်ဟု ကြေညာချက်တွင် ပါရှိသည်။

ထို့အတူ မြန်မာ့နိုင်ငံရေး အပြောင်းအလဲကို အမှန်တကယ် လက်တွေ့ကျကျ ပြောင်းလဲပေးနိုင်မည့် နိုင်ငံရေးပါတီမှာလည်း အမျိုးသားဒီမိုကရေစီ အဖွဲ့ချုပ်မှ တစ်ပါး အခြားမရှိနိုင်ကြောင်း၊ အဘယ်ကြောင့်ဆိုသော် အမြော်အမြင်ရှိသည့် အားကောင်းသော ခေါင်းဆောင်မှု၊ တောင့်တင်းခိုင်မာသော လူထုထောက်ခံမှုရှိသည့် ပါတီ၊ ပြည်သူလူထုနှင့် တစ်သားတည်းကျသော ဒီမိုကရေစီ မူဝါဒလမ်းစဉ် စသည့် မွန်မြတ်သော အရည်အချင်းနှင့် ဂုဏ်ရည်သုံးရပ်တို့ ထပ်တူကျသည့် နိုင်ငံရေးပါတီသည် အမျိုးသားဒီမိုကရေစီ အဖွဲ့ချုပ် တစ်ဖွဲ့တည်းသာ ရှိပေသည်ဟု ကြေညာချက်တွင် ဖော်ပြထားသည်။

ဗိုလ်ချုပ်အောင်ဆန်းသည် ဖဆပလ အဖွဲ့ချုပ်ကြီးကို ခေါင်းဆောင်လျက် ၁၉၄၇ ခုနှစ် တိုင်းပြုပြည်ပြု လွှတ်တော်ရွေးကောက်ပွဲကြီးမှတစ်ဆင့် မြန်မာနိုင်ငံ၏ အမျိုးသားလွတ်လပ်ရေးနှင့် တိုင်းရင်းသား သွေးစည်းညီညွတ်ရေးတည်းဟူသော နိုင်ငံရေး အလှည့်အပြောင်းကို ပုံဖော်ခဲ့ကြောင်း၊ ထို့အတူ လူထုခေါင်းဆောင် ဒေါ်အောင်ဆန်းစုကြည်သည်လည်း အမျိုးသားဒီမိုကရေစီ အဖွဲ့ချုပ်ကို ပဲ့ကိုင်လမ်းညွှန်လျက် ၂၀၁၅ ခုနှစ် ပါတီစုံ ဒီမိုကရေစီ အထွေထွေရွေးကောက်ပွဲကြီးမှ တစ်ဆင့် မြန်မာနိုင်ငံ၏ ဒီမိုကရေစီနှင့် အမျိုးသားပြန်လည် သင့်မြတ်ရေး၊ နိုင်ငံရေး အလှည့်အပြောင်းကို အမှန်တကယ် ပြောင်းလဲနိုင်တော့မည် ဖြစ်သည်ဟု NLD ၏ ကြေညာချက်တွင် ပါရှိသည်။

အမျိုးသား သွေးစည်းညီညွတ်ရေး၊ ငြိမ်းချမ်းရေးနှင့် ဒီမိုကရေစီ အရေးသည် အမျိုးသားဒီမိုကရေစီ အဖွဲ့ချုပ်၏ ပင်မမူဝါဒဖြစ်ကြောင်း၊ ထို့ကြောင့်လည်း ဒီမိုကရေစီခေါင်းဆောင် ဒေါ်အောင်ဆန်းစုကြည်က ဒီမိုကရေစီ ဖက်ဒရယ်ပြည်ထောင်စု ထူထောင်ရေး ရည်မှန်းချက်ကို လွန်ခဲ့သည့် ၂၇ နှစ်အတွင်း အန္တရာယ် အခက်အခဲမျိုးစုံနှင့် ကြုံတွေ့ခဲ့ရသော်လည်း လုံးဝလက်မလွှတ်ခဲ့ကြောင်း၊ ၂၀၁၀ ခုနှစ်က စပြီး NLD က ဒုတိယပင်လုံ ညီလာခံ ကျင်းပရေးကို ဦးတည်ခဲ့ကြောင်း၊ နိုင်ငံတည်ငြိမ်အေးချမ်းစွာ ပြောင်းလဲနိုင်ရေးအတွက် ဆက်လက်ဆောင်ရွက်သွားမည်ဖြစ်ကြောင်း စသည့် NLD ၏ မူဝါဒများနှင့် ရှေ့ဆက်လုပ်ဆောင်မည့် လုပ်ငန်းစဉ်များနှင့် ပတ်သက်ပြီးလည်း ကြေညာချက်တွင် ထည့်သွင်း ရေးသားထားသည်။

အမျိုးသားဒီမိုကရေစီ အဖွဲ့ချုပ်သည် (၁) တိုင်းရင်းသား အရေးနှင့် ပြည်တွင်းငြိမ်းချမ်းရေး၊ (၂) ပြည်သူတစ်ရပ်လုံး အေးချမ်းလုံခြုံစွာ လက်တွဲနေထိုင်ရေးကို အာမခံချက်ပေးနိုင်မည့် ဖွဲ့စည်းပုံ အခြေခံဥပဒေတစ်ရပ် ပေါ်ထွန်းရေး၊ (၃) ပြည်သူလူထုအား တရားမျှတစွာ အကာအကွယ်ပေးမည့် အုပ်ချုပ်မှု စနစ်တစ်ရပ် ပေါ်ပေါက်လာရေး၊ (၄) လွတ်လပ်လုံခြုံစွာ ဖွံ့ဖြိုးတိုးတက်ရေးဟူသည့် ရည်မှန်းချက်များကို ၂၀၁၅ ခုနှစ် ရွေးကောက်ပွဲ ကြေညာစာတမ်းတွင် ထုတ်ဖော်ခဲ့သည်။

NLD နာယက ဦးတင်ဦး “အမျိုးသားဒီမိုကရေစီ အဖွဲ့ချုပ်နဲ့ ဒေါ်အောင်ဆန်းစုကြည်ဟာ မြန်မာ့နိုင်ငံရေးမှာ ဒင်္ဂါးပြားရဲ့ ခေါင်းနဲ့ ပန်းလို ခွဲခြားမရသလို နိုင်ငံရေးပါတီနဲ့ နိုင်ငံရေးခေါင်းဆောင် ထပ်တူကျ သဟဇာတ ဖြစ်မှုကိုလည်း ထူးထူးခြားခြား ကြုံတွေ့နေကြရပြီ ဖြစ်ပါတယ်။ တစ်နည်းအားဖြင့် ပြောရရင် အမျိုးသားဒီမိုကရေစီ အဖွဲ့ချုပ်နဲ့ လူထုခေါင်းဆောင် ဒေါ်အောင်ဆန်းစုကြည်ဟာ ၈၈ ဒီမိုကရေစီ လူထုအရေးတော်ပုံ သမိုင်းက တောင်းဆိုလို့ ပေါ်ထွန်းလာရတဲ့ ပါတီနဲ့ ခေါင်းဆောင်ပဲ ဖြစ်ပါတယ်။ ဒါကြောင့် ၂၀၁၅ ရွေးကောက်ပွဲမှာ ပါတီနဲ့ ခေါင်းဆောင်ကို အကဲဖြတ်ပြီး ပြတ်ပြတ်သားသား ဆန္ဒမဲပေးရမယ့် အဖွဲ့အစည်းဟာ အမျိုးသားဒီမိုကရေစီ အဖွဲ့ချုပ်သာ ဖြစ်ပါတယ်” ဟု ပြောကြားသည်။

သတင်းနှင့် ဓါတ်ပုံ – Eleven Media Group

Style switcher RESET
Body styles
Color settings
Color 1
Color 2
Background image